基地 長洲

基地 評價 相片

去到長洲 多數人都中意沿海邊食海鮮咁但係質素嘅參差都比較出名所以不如就去食其他野啦長洲都唔算大 喺其中一條去東堤嘅路上轉入一條小路就見到佢喺長洲冰室附近 都稱唔上係一間舖頭都係坐喺室外 有舊式大排檔嘅感覺不過佢係食泰國野或者打邊爐入左8月嘅香港 喺室外 我估唔到都好多人打邊爐但作為正常人 我會食泰國嘢冬陰公湯 係平時米線舖嗰種碗黎裝 冇火熱住我嘅朋友們大讚佢嘅酸同辣嘅平衡做得好好👍🏾 個味好正 椰汁味都好出對佢哋係接受到嘅辣度不過對我就係偏辣左( ´▽｀) 料好足 除咗必然嘅香茅 同南薑仲有2大隻蝦 三隻細蝦粟米荀 蕃茄 菇塊 蘑菇 湯大概裝到五碗左右豬頸肉我覺得係好食嘅燒過嘅表皮好香 肉心係juicy嘅不過美中不足嘅係佢唔熱都所以應該係燒好一段時間個汁我自己覺得唔太夾同平時出面泰國野唔同就咁食會好食啲通菜冇渣但油多 不過我覺得係好食嘅其實係唔似平時食到嘅馬拉盞風味好少好少辣 我係夾完又夾嘅魷魚鬚其實我覺得冇乜特別不過我朋友係話讚呢個好食嘅至少呢個係熱嘅 啲腳都燒到好香同埋其實佢都幾大碟串燒6串 應該係雞牛豬？我就冇食到牛嘅串燒食落唔乾 多汁 其實就已經好好食聽講個牛都好食 最後要係佢係熱 就prove到唔係整定左一段時間然後叮都冇叮就放出黎三個人三杯野飲叫左走甜 咁turn out出黎係酸嘅即係唔係用雪碧沖👍🏾好大杯 嗌左黎飲會有種點解飲極都仲有嘅感覺三個人食 就算冇叫粉面啊飯啊都係飽嘅意料之外嘅大碟同親民嘅價錢題外話 店員帶我地坐喺水桶 膠兜隔離轉個頭無啦啦掟個汽水罐過黎嚇親我嗰下先知嗰道係垃圾桶。

。

冇加一 成件事係應該真係做開街坊生意

每次係長洲食晚餐係咪都諗爆頭?我記得好幾次都係經過D打冷叫餸食飯既大排檔，比D姐姐SELL下就坐低左，因為都係一大班人去長洲，可以食既餐廳好有限，但今次終於比我搵到第2個選擇。

每次經過呢間餐廳都見到有人係出邊打緊邊爐食緊串燒，夜晚經過呢度會比佢D香氣同氣氛吸引住。

記得好耐之前黎長洲有食過一次，好唔好食已經唔記得，但夜晚坐係出面打邊爐係幾有氣氛，尤其係個次應該係12月天氣比較凍，唔想又食打冷食海鮮餐所以見到呢間就即刻扑鎚。

今次本身唔係想食呢間，但經過個時有諗過食呢間，點知想食既兩間餐廳都收左所以就去返呢間。

呢間餐廳係泰國菜餐廳，同時有提供打邊爐、雞煲。

1️⃣ 火鍋湯底(泰國冬陰) (蕃茄茨) 💰85（👅: 9/10）（👅: 7.5/10）因為我有印象呢間隨左係打邊爐之外，仲係一間泰國菜餐廳，於是即刻係湯底搵到我最想試既泰國冬陰湯底，因為怕冬陰湯底太辣或者太重口味，雙併另一邊就揀左相對比較清既蕃茄薯仔豬骨湯底。

MENU上有寫到湯底可以雙併，以價格較高者計算，另外如果係叫湯底自己再揀餸就係湯底個頁揀，佢仲有精選火鍋提供，即係本身已經有D特色餸係湯底入面，好似基地牛魔王、四川酸菜魚鍋、香辣雞煲、花雕醉雞煲等。

泰國冬陰湯底飲落夠酸，辣就唔算好辣，所以唔食得辣既人都試到，好好飲好開胃，真係會一啖一啖咁飲而唔係打邊爐。

加左水之後就更加無咩辣，但酸味依然，如果佢可以多返D辣就好，而且感覺就咁飲好好飲，但餸唔係樣樣都好入到呢隻味，要食好似響鈴呢D索湯既餸先好入味，食牛肉個D就冬陰味無太入味。

蕃茄薯仔豬骨湯底反而比較普通，個湯基本上無咩味，唯一好處就係佢有好多蕃茄薯仔，叫呢個湯底等如叫左一碟菜咁，我會羅D蕃茄薯仔掉返落泰國冬陰湯底度食。

2️⃣ 手切肥牛(小) 💰168（👅: 7.5/10）價錢最貴不過份量正常嘅牛肉，食落質素都唔算好差，會比一啲平價嘅任食牛肉質素高一啲，起碼好過油麻地花園酒家，會食到牛味，但唔會話油脂好豐富分布好平均，或者入口好嫩滑嘅肥牛。

3️⃣ 豬頸肉片 💰58（👅: 8/10） 份量又係非常慷慨嘅豬頸肉，感覺好似食極都食唔晒，豬頸肉個油脂感足夠，食落唔會話好韌，滿足到食豬頸肉嘅滿足感。

4️⃣ 神戶牛利片 💰58（👅: 9/10）呢碟係成晚覺得最好食既一碟餸，我本身好鍾意食牛舌，不過打邊爐好小會對牛舌有期待，再加上佢叫"神戶"，諗住係一般水準既牛舌，點知食落係有驚喜。

以打邊爐來講呢塊牛舌都算厚切，食落係幾嫩，同一般日本食嘅燒牛舌唔同，嗰啲口感會比較實啲，但鹽燒同調味會做得好啲，呢舊就有啲入口即溶嘅感覺，但呢個價錢有咁嘅份量同質素實在非常抵食。

5️⃣ 牛柏葉 💰48（👅: 8/10）份量非常多嘅牛柏葉，多到佢會俾埋牛柏葉個頭，牛柏葉食落係正常嘅爽口程度，當然未係我食過最爽口嘅，但基本上擺邊爐都非常入味，但頭果部份食落就會比較韌難入口。

6️⃣ 響鈴 💰38（👅: 8/10）響鈴粉嶺數量都幾多有七條，每條個大細都適中，浸完湯會可以一啖食到，本身響鈴都炸得夠酥脆，基本上浸1秒已經索道湯嘅精華同時保持到小小嘅咬口，再加上佢將冬陰功湯嘅精華索晒入去，非常入味。

7️⃣ 油麥菜 💰26（👅: 7.5/10）份量都慷慨嘅蔬菜，叫咗咁多碟最咪食唔晒呢碟，可能因為另一個湯底都係蔬菜，食好多蕃茄薯仔都食到飽，但比起出邊要可能$40一碟菜，依間嘅蔬菜算幾抵食。

8️⃣ 龍眼冰 💰28（👅: 7/10）飲落係偏甜既龍眼冰，唔算凍應該係整完先加冰，有龍眼肉，不過甜味飲落唔似係龍眼自然既甜，多來自糖漿或者人工既龍眼濃汁。

9️⃣ 金桔檸檬沙冰 💰28（👅: 7.5/10）飲落幾清涼，唔算好甜比起龍眼冰，同味道比較自然小小，打邊爐飲格外解渴同消暑。

🌟比起食海鮮餐叫餸食飯，我覺得喺室外打邊爐更加有氣氛，而且湯底同食物質素都唔錯，價錢都唔算貴人均二百幾，喺長洲絕對係一間質素唔錯嘅晚餐選擇，餸多數都非常抵食，價錢唔算貴但份量好充足。

不過坐室內位落單就冇咁方便，因為店員唔會特登行入嚟，除非佢咁啱執緊枱，可能要行出去俾佢見到揮手。

但依間打邊爐我諗下次去長洲都會再嚟食，下次會想試花雕醉雞煲，會嘗試佢泰國菜嘅小菜同燒物。

👅味道: 8.5/10🍴環境: 7/10💰消費: $537/2人 (服務費: NA)

入到長洲探朋友，晚飯嘅時候在地朋友就帶左我地去一間火鍋店，店入面有室內同室外位置，室外嘅位置係用卡式石油氣爐，係市區已經少見，別具風味。

我地點左一個藥膳湯底嘅火鍋，湯頭清甜帶淡淡藥材嘅味道，當晚點嘅大部分食材包括雞肉同其他火鍋料都好新鮮，尤其是牛肉非常嫩滑。

飲品方面，選擇亦非常多，我地就點左椰青，非常解渴，最適合火鍋時飲用。

當日店員嘅服務態度好好，非常勤快。

所以黎左依度之後就知道下次入長洲，除左食海鮮，重可以選擇黎依家店食好食嘅火鍋。

長洲餐廳多, 但係多數都係茶餐廳, 選擇少, 試食過兩間泰國菜, 都係麻麻地, 兩間都貴 (同港島有得比). 我成日經過都見到好多人, 所以今次諗住去睇下佢哋係買乜嘢, 原來係泰國菜加打邊爐, 呢間係第三間試嘅泰國菜, 平啲之餘, 份量亦都幾好, 第一次食pat thai有咁多隻蝦 (起碼有六、七隻) 亦都炒得幾好食! 豬頸肉好好食, 嗌咗幾份 (我哋係兩大三小食), 唯一嘅唔好處就係地方那渣啲, 啲枱開響公廁後面😅 我哋坐咗入去有冷氣嘅地方. 我老公話啲青咖哩雞幾好食夠辣又唔係太難, 生菜包豬肉ok, 個味唔差不過有啲乾,恐龍蛋唔錯, 我小朋友至愛. 下次會再去試下佢啲打邊爐, 見佢個打邊爐餐牌好似有好多嘢食 😋😋😋

      今日係2019年8月19日星期一,家姐班𡃁仔放暑假落咗嚟長洲玩,去到夜晚我就同老婆帶班𡃁仔去基地食飯打邊爐!      之前試過去到先發覺無冷氣房,所以下晝已經去咗訂定6點半冷氣房先!      去到6點半我地就準時到達,一到步就已經發覺到驚奇位(一),竟然有位帶住圍裙嘅金毛哥哥仔好熱情咁親自帶位同招呼我地!『驚奇位(一) 點解我會覺得驚奇?因為之前去到食飯,就算已經提前訂枱,但嚟到門口同樓面講已訂枱幾點幾多位都好,都一定要左等右等,樓面問完同事坐邊,同事又要再問老闆娘坐邊左問右問幾個字都埋唔到位坐囉』      好啦,當樓面哥哥安排我地坐係冷氣房大圓枱之後,就已經立即遞上豉油﹑筲箕﹑餐牌同火鍋紙,之後係我地剔火鍋紙嘅時候,樓面哥哥已經好識做咁問我地:「幾位打邊爐今日有D特別蔬菜,有無興趣試試,有羅白笛﹑波菜﹑油蜜菜.....(佢講咗一大堆我都唔記得有咩啦」之後哥哥仔又再推介：「食唔食魚?今日有新鮮魚返咗,有魚仲....(又係講咗幾樣,但我又唔記得咗啦」       之後,我地就簡咗魚仲﹑波菜同油蜜菜,呢個時候驚奇位(二)出現啦,樓面哥哥仔竟然識得主動同我地講:「大家啱啱嚟到,口唔口渴?洗唔洗同你地落咗嘢飲先?同埋湯底要等佢滚一陣先幫你落埋湯底先好唔好?」『驚奇位(二)係在於之前嚟食嘢,唔好話侍應主動推介食物,就算係我地主動叫佢落單嘢飲都要左叫右叫先會有人理會我地囉仲有我地之前試過好多次,食物上咗好多係枱,但係個湯底都未到,去到等到湯底上又要再等佢慢慢水滚,真係正宗有得睇無等食囉』之後,哥哥仔就去咗落嘢飲單先,叫我地慢慢剔邊爐紙,好啦我呢個時候第一時間同老婆講我要食我的最愛冰豆腐﹑金牌肥牛同埋日本肥蠔宜班細路就話要食丸類同芝士腸同響鈴.....      到我地剔完火鍋紙嘅時候,樓面哥哥又已經咁啱送上飲品同湯底,咁我地就比咗張邊爐紙哥哥落單,慢慢静待送上食物可能係星期一人客唔多再加上神速樓面哥哥嘅關係,差唔多45個字後湯又咁啱滚起,我地嘅食物已經全部送上,咁我地就唔客氣喇,大家一齊搶肥牛食先,需然我嘅食量比唔上班𡃁仔,但係係靚肥牛面前我一定唔會輸蝕搶先放入口中,肥牛嘅油脂係口內嘅香氣真係非常大滿足      就係我地狼吞虎嚥之際,今晚嘅驚奇位(三)又出現啦,樓面哥哥竟然識得主動同我地講:「老細,唔好意思打攪你一下,你地嘅Order應該已經全部上哂㗎啦,你地點一點睇下啱唔啱?啱嘅話仲有無其他嘢需要或者加單?」『驚奇位(三)係在於樓面哥哥唔單止食物無上錯上少,而且更可以知道已經上完,仲會肯主動提醒,細心問候有無其他需要,呢種服務態度真係我以前從未係基地見過同享受過,之前嚟幾次試過唔單止落錯單上漏嘢,而且進食途中仲會好似孤兒仔咁無人理,想揾人落單都要三吹四請先會有回應,完全影響食嘢嘅心情囉』      去到最後埋尾需然發生咗一段小插曲就係班𡃁仔想鮑肚D,就再加單咗烏冬同公仔面, 但等一陣都未見上菜就問問哥哥仔點解未到,而哥哥仔出去之後好快就帶著烏冬同公仔面返嚟,仲好歉意咁解釋話：「sorry...sorry!可能部單機卡咗紙所以出唔到單比廚房,所以遲咗,唔好意思!」,之後我都回話講：「唏....少少事洗咩sorry丫,唔緊要無問題!」     食飽哂我地就埋單走人,今晚總數7個人食咗千零蚊,到我地起身走個陣,竟然見到隔離台上菜上咗一大碟咖喱炒蟹,睇落呢度除咗火鍋之外,炒菜同泰菜都好似好有水準,就同樓面哥哥講:「咦...呢度D泰菜好似好正咁喎,價錢係咪同火鍋差唔多?」樓面哥哥就回應我：「哦...呢個炒蟹我地其實無賣,係客人自來海鮮,之後我地幫客人加工收返少少加工費,你下次嚟都可以試下帶海鮮嚟加工,收費唔會太貴,幾十蚊個菜到!」     我地一路步出大門,哥哥仔就笑笑口同我地講:「多謝哂...老細,歡迎下次再來!」咁我都禮貌地回話：「好..放心,下次一定會再嚟,不過下次記住埋單個陣,同班𡃁仔計就得,下次到佢地請啦!」哥哥仔就回應：「好無問題,多謝哂...老細...拜拜....!」  總結：其實本身嚟食嘢無諗過會打呢篇食評,所以我都無影到相,原來諗住需然基地以前樓面服務真係不敢恭為,但確實食物質數同水準都好好,所以簡嚟呢度食飯,但係今次嚟到除咗食物保持一貫水準,而且再加上咁欣勤嘅招待真係令我對呢度徹底改觀,甚至可以講就算出面港島都未必有嘅服務態度,我真係覺得要寫呢篇食評表揚一下呢位樓面哥哥,完全設合咗華仔嘅一句名言：「今時咁嘅服務態度真係唔夠,你地要學下呢位樓面哥哥啦(後面呢句我私心加嘅)」                 

基地餐單提供泰國菜,火鍋,燒烤,雞煲等推介美食位於長洲區，餐廳座位數未知人均消費約$101-200，結賬可以用現金,微信支付，Booking訂位可以電話致電29812218查詢。

您對於長洲餐廳「基地」有何comment？

基地餐廳詳細資料：

• 基地地址:
  長洲新興海傍街3號地舖
  Base To Eat, G/ F,3 San Hing Praya Street, Cheung Chau
• 基地電話: 29812218
• 基地價錢: $101-200
• 分類: 泰國菜,火鍋,燒烤,雞煲,
• 座位: 未知
• 付款: 現金,微信支付
• FB專頁: 基地 Facebook

更多基地相關資料:

• 基地分店
• Youtube
• Facebook
• Twitter
• Google

香港餐廳2023推介03月